काठमाडौँ । न्याय सेवा आयोगले १० जना सहायक न्यायाधिवक्तालाई उपन्यायाधिवक्तामा बढुवाका लागि सिफारिस गरेको छ ।

न्याय सेवा आयोगको बैठकले ज्येष्ठता तथा कार्यसम्पादनका आधारमा ५ जना र कार्यक्षमता मूल्याङ्कनका आधारमा ५ जनालाई बढुवा गर्न न्याय परिषद्समक्ष सिफारिस गरेको छ ।

वैदेशिक रोजगार विभागका सहायक न्यायाधिवक्ता राजेन्द्र रेग्मीलाई उच्च सरकारी वकिल कार्यालय राजविराजका लागि उपन्यायधिवक्तामा बढुवा गर्दै पदस्थापनका लागि सिफारिस गरेको छ ।

उच्च सरकारी वकिल कार्यालय विराटनगरका मुकुन्दकुमार रेग्मीलाई जिल्ला सरकारी वकिल कार्यालय तेह्रथुमको जिल्ला न्यायाधिवक्ता लागि सिफारिस गरिएको छ ।

जिल्ला सरकारी वकिल कार्यालय प्युठानका मदन शर्मालाई  उच्च सरकारी वकिल कार्यालय पोखराका लागि उपन्यायाधिवक्तामा सिफारिस गरेको छ । 

जिल्ला सरकारी वकिल कार्यालय डोल्पाका विजयराज घिमिरेलाई उच्च सरकारी वकिल कार्यालय पाटनको उपन्यायाधिवक्तामा सिफारिस गरेको छ र जिल्ला सरकारी वकिल कार्यालय धादिङका लक्ष्मीकिशोर शर्मालाई  उच्च सरकारी वकिल कार्यालय दिपायलका लागि उपन्यायाधिवक्ताका लागि सिफारिस गरिएको छ ।

कार्यक्षमताका आधारमा बढुवा सिफारिस हुने ५ जनामा सत्य निरूपण तथा मेलमिलाप आयोगका भक्ति उपाध्याय, उच्च सरकारी वकिल कार्यालय पाटनकी शिलुका लिंथेप, उच्च सरकारी वकिल कार्यालय विराटनगरका कल्याण पराजुली, जिल्ला सरकारी वकिल कार्यालय काठमाडौँका पूर्णबहादुर केसी र महान्यायाधिवक्ताको कार्यालयका दीपक बस्याल बढुवाका लागि सिफारिस भएका छन् ।