धुर्मुसको रंगशाला संकट झन् गहिरियो, भरतपुरसँगको वार्ता निष्कर्षविहीन

गौतम बुद्ध अन्तर्राष्ट्रिय क्रिकेट रंगशालाको बक्यौता समाधानको प्रयास फेरि असफल भएपछि कलाकार धुर्मुस (सीताराम कट्टेल) उत्कट निराशासहित परियोजनाबाट हात झिक्ने संकेत गरेका छन्।

पाँच वर्षदेखि निरन्तर संघर्ष गर्दै आएको गौतम बुद्ध क्रिकेट रंगशाला निर्माणको बक्यौता टुंग्याउने प्रयास फेरि एकपटक विफल भएको छ। संघीय सरकारले निकासा गरिसकेको १५ करोड रुपैयाँ चार महिनादेखि रोकेर राख्ने भरतपुर महानगरसँगको हिजोको छलफल सकारात्मक नबनेपछि परियोजना पुनः अनिश्चितताको गर्तमा परेको छ।

प्रचण्डकी छोरी रेणु दाहाल नेतृत्व भएको भरतपुर महानगरले आवश्यक कागजात, प्रक्रिया र शर्त पूरा गरिएका दाबी हुँदाहुँदै पनि रकम नछोडेको धुर्मुसको आरोप छ। उनका अनुसार महानगरले समयमै निर्णय नलिँदा निर्माणधीन रंगशाला थप जटिल स्थिति भोगिरहेको छ।

वार्ता चिसो माहोलमै टुंगिएपछि निराश धुर्मुसले कठोर शब्दमा भने—
“जेल जान तयार छु, तर अब महानगरमा फर्केर आउँदिन।”

उनको यो अभिव्यक्तिले परियोजना भविष्यप्रति थप प्रश्न खडा गरेको छ। रंगशाला निर्माणमा आफ्नो जीवन, प्रतिष्ठा र आर्थिक हैसियत दाउमा लगाएका धुर्मुस–सुनील फाउन्डेशनका लागि यो अवस्था ठूलो झट्का मानिएको छ।

अब रंगशाला बक्यौताको समाधान कसरी र कहिले निकालिन्छ भन्ने प्रश्न खुला छ, तर परियोजना झन् अनिश्चित बन्दै गएको स्पष्ट देखिन्छ।