जेन–जी आन्दोलन र एमाले समर्थक युवाबीच लगातार बढ्दो तनावले काठमाडौँदेखि मधेशसम्म सुरक्षा अवस्था चर्किँदै गएको छ।

काठमाडौँबाट उडान भर्न लागेको विमानमै जेन–जी प्रदर्शनकारीले अवरोध गरेपछि एमाले नेता शंकर पोखरेल, भानुभक्त ढकाल र महेश बस्नेतलाई जबरजस्ती ओर्लनु परेको आजको घटनाले राजनीतिक माहोल अझ तनावपूर्ण बनेको छ। प्रदर्शनकारीहरूले ‘अराजक गतिविधि र मधेशविरोधी वक्तव्य’ को आरोप लगाउँदै विमानमै नाराबाजी गरेका थिए।

उता, सिमरा क्षेत्रमा जेन–जी कार्यकर्ता र एमाले समर्थक युवाबीच झडप तीव्र भएपछि स्थिति नियन्त्रणका लागि स्थानीय प्रशासनले कर्फ्यु नै लगाउनुपरेको छ। झडपमा दुवै पक्षका युवाहरू घाइते भएका रिपोर्टहरू आएका छन्।

घटनाको दोष एमालेकै गतिविधितर्फ देखाउँदै जेन–जी मधेश प्रदेश संयोजक शिव यादवले महेश बस्नेतका ‘उक्साहटपूर्ण र अराजक अभिव्यक्ति’ ले मधेशमा हिंसा भड्काउन सक्ने चेतावनी दिए। उनले सरकारलाई बस्नेतमाथि ‘प्रदेश प्रवेश निषेध’ गर्ने कडा माग समेत गरेका छन्।

यादवका अनुसार, “मधेशलाई उक्साउने भाषण र राजनीतिक कुटनीति अब सह्य छैन। मधेश शान्त चाहन्छ, अपमान होइन।”

सुरक्षा निकायले दुवै घटना सम्बन्धी छानबिन अघि बढाइएको बताएको छ। स्थिति थप बिग्रन नदिन काठमाडौँदेखि बारा–सिमरा क्षेत्रसम्म सुरक्षा सतर्कता कडा पारिएको छ।