आइसिसी पुरुष टी–२० विश्वकप एसिया तथा इएपी छनोटमा नेपालले सुपर–६ चरणमा स्थान सुनिश्चित गरेको छ।

समूह–२ को खेलमा बिहीबार जापानले कुवेतलाई ५ विकेटले हराएपछि कुवेत लगातार दुई खेलमा पराजित हुँदै बाहिरियो र नेपाल तथा जापान अन्तिम खेलअघि नै सुपर–६ मा पुगे।

नेपालले बुधबार कुवेतलाई ५८ रनले हराएको थियो। जापानले पनि बिहीबार कुवेतले दिएको १७८ रनको लक्ष्य ३ बल बाँकी रहँदा ५ विकेट गुमाउँदै पूरा गर्‍यो। जापानका इसम रहमानले ३९ बलमा ९ चौका र २ छक्का सहित ६४ रन जोडे। कप्तान कोडावाकी फ्लेमिङले १९ बलमा २८ रन, रविचन्द्रनले २९ बलमा ३९ रन र ताकाहाशीले १५ बलमा २६ रन बनाए।

अब शुक्रबार नेपाल र जापानबीच समूह विजेताका लागि खेल हुनेछ। यो खेलको नतिजाबाट प्राप्त अंक सुपर–६ मा समेत गन्ने भएकाले दुवै टोलीका लागि खेल महत्वपूर्ण हुनेछ।

यस छनोटबाट शीर्ष तीन टोलीले भारत र श्रीलंकामा फेब्रुअरी–मार्च २०२६ मा हुने आइसिसी टी–२० विश्वकपमा स्थान पक्का गर्नेछन्। सुपर–६ मा पुग्न समूहको शीर्ष २ आवश्यक छ भने विश्वकपको लागि सुपर–६ को शीर्ष ३ भित्र पर्नु पर्नेछ।

नेपाली टोलीले हालै युएईमा वेस्ट इन्डिजविरुद्धको टी–२० सिरिज २–१ ले जितेर इतिहास रचेको थियो र अब लगातार दोस्रो तथा समग्रत: तेस्रो पटक विश्वकपमा पुग्ने लक्ष्यमा छ।

समूहहरू:

समूह १: युएई, मलेसिया, कतार
समूह २: नेपाल, कुवेत, जापान
समूह 3: ओमान, पिएनजी, सामोआ